ក្រោយពីចាកចេញពីប្រទេសកំណើត ធ្វើដំណើរបោះពួយទៅច្រៀង និងរាំរកប្រាក់នៅប្រទេសកាណាដា កាលពីចុងខែវិច្ឆិកា ឆ្នាំ២០១២ តារាសម្តែងនាង កុល ដាវី បានវិលត្រលប់មកដល់ស្រុកកំណើត វិញហើយ កាលពីរសៀលថ្ងៃទី២៣ ខែមករា ឆ្នាំ២០១៣ ម្សិលមិញនេះ ដោយរួមដំណើរជាមួយលោក សុខ រក្សា តារាចម្រៀងប្រចាំផលិតកម្មសាន់ដេ។ ចុះពីយន្តហោះភ្លាម នៅម៉ោងប្រហែល១១ និង៥៥ នាទី តារាទាំងពីរបានផ្តល់បទសម្ភាសន៍ជាមួយអ្នកសារព័ត៌មានប្រកបដោយទឹកមុខរីករាយថា ពួកគេចេញទៅសម្តែងនៅប្រទេសកាណាដារយៈពេលជិតពីរខែនេះ គឺទទួលបានជោគជ័យយ៉ាងធំធេង ដែលបានចេញច្រៀង និងសម្តែងជាច្រើនរដ្ឋ ដែលមានបងប្អូនខ្មែររស់នៅ។ កុល ដាវី ប្រាប់ឲ្យដឹងថា នាង និងលោក សុខ រក្សា ចេញច្រៀង និងសម្តែងក្នុងមួយសប្តាហ៍ ពី២ ទៅ២ ថ្ងៃ គឺនៅរៀងរាល់ថ្ងៃសុក្រ សៅរ៍ និង ថ្ងៃអាទិត្យ ដែលទាំងបីថ្ងៃនេះ ជាថ្ងៃដែលបងប្អូននៅប្រទេសកាណដា ឈប់សម្រាកពីការងារ។ នាងបន្ថែមថា ក្នុងមួយថ្ងៃ នាងត្រូវច្រៀងពី៤ ទៅ៥ម៉ោង គឺចាប់តាំងពីម៉ោង៩យប់ រហូតដល់ម៉ោង១២យប់។ ទោះជាមានការហត់នឿយបន្តិចក៏ដោយ ប៉ុន្តែតារាទាំងពីរបែរជានិយាយថា នៅតែទទួលតបស្នងមកវិញនូវការស្រឡាញ់រាប់អានពីសំណាក់បងប្អូនខ្មែរនៅប្រទេសកាណាយ៉ាងក្រៃលែង ហើយក៏មានអ្នកខ្លះបានទាំងសុំពួកគេធ្វើកូនធម៌ ប្អូនធម៌ ទៀតផង។ លោក សុខ រក្សា ក៏បានបង្ហើបប្រាប់ថា ក្នុងដំណើរចេញច្រៀងនៅប្រទេសកាណាលើកនេះ គឺភាពជោគជ័យជាចម្បងនោះ បានមកតែពីភាពសិចស៊ីរបស់កញ្ញា កុល ដាវី ដែលជាចំណុចមួយគួរឲ្យទាក់ទាញ ប៉ុន្តែមិនមែនសិចស៊ីហួសហេតុនោះទេ លើសពីនេះ គឺ ដាវី ចេះរាក់ទាក់ រួសរាយ ដែលនាំឲ្យបងប្អូនខ្មែរនៅកាណាដា ស្រលាញ់ចូលចិត្ត និងអ្នកខ្លះ បានសុំធ្វើកូនធម៌ ប្អូនធម៌ផងដែរ។ ចំណែក នាង កុល ដាវី ក៏បាននិយាយឲ្យដឹងដែរថា មិនមែនតែនាងម្នាក់ទេ ដែលមានភាពទាក់ទាញ និងចាប់អារម្មណ៍ពីសំណាក់បងប្អូនខ្មែរនៅកាណាដានោះ សូម្បីតែលោក សុខ រក្សា ក៏មានចំណុចឲ្យគេចាប់អារម្មណ៍ច្រើនដែរ គឺលោកច្រៀងក៏ពិរោះ និងថែមទាំងចេះលេងហ្គីតាយា់ងស្ទាត់ជំនាញទៀតផង៕ ប្រភពៈ ann
No comments:
Post a Comment