khmerzoom
ខណៈដែលតារាចម្រៀងប្រុសៗស្ទើរតែទាំងអស់ ពិសេសតារារបស់ហង្សមាស កំពុងត្រូវបានគេសរសើរមិនដាច់ពីមាត់ ស្រាប់តែគេក់តសម្គាល់ថា លោកខេមរៈ សិរីមន្តស្ងាត់ឈឹង ដោយប៉ុស្ដិ៍ទូរទស្សន៍ក៏មិនសូវឡើង ហើយយុវវ័យក៏មិនសូវរំលឹកពីឈ្មោះរបស់លោកដូចមុនទៅវិញ។ ទោះយ៉ាងណា ប្រភពពីសាន់ដេ បានអះអាងថា នោះគឺដោយសារតែលោកជាប់ថតរឿងក្រោមចំណងជើងថា «វិញ្ញាណបិសាចជញ្ជក់ឈាម» ហើយមិនសូវមានពេលលេងស្ទីល និងចេញច្រៀងប្រូម៉ូដបទឲ្យញឹកញាប់ប៉ុណ្ណោះ ទើបរាងស្ងាត់បែបហ្នឹង។
រយៈពេលជិតកន្លះឆ្នាំចុងក្រោយនេះ លោកខេមរៈ សិរីមន្ត មិនសូវមានយីអ៊ុនក្នុងពិភពចម្រៀងឡើយ បន្ទាប់ពីបទថ្មីៗរបស់លោកស្រាប់តែខ្វះការគាំទ្រក្នុងសន្ទុះខ្លាំងដូចមុន។
តារាយុវវ័យជាច្រើន លើកឡើងថា តាំងពីលេងស្ទីលកាត់សក់ខ្លី ហើយទទួលការចាប់អារម្មណ៍តែមួយខ្យល់នោះមក តារាចម្រៀងរូបនេះ ហាក់ដូចជាស្ថិតនៅកន្លៀតជញ្ជាំងតែម្ដង បើធៀបនឹងតារាយុវវ័យផ្សេងទៀត ពិសេសតារាៗដែលជ្រកនៅហង្សមាសទាំងចាស់ទាំងថ្មី ដែលពេលនេះគឺពួកគេកំពុងតែទទួលការចាប់អារម្មណ៍។ បទចម្រៀងភាគច្រើនរបស់លោកខេមរៈ សិរីមន្ត មិនសូវឮគេចាក់បទថ្មីរបស់លោកឡើយ ខណៈដែលបើឮចាក់ គឺបែរជាឮតែបទល្បីចាស់ៗទៅវិញ។ អ្នកគាំទ្រលោកភាគច្រើន មិនមានទឹកមាត់លេបឡើយ នៅពេលឃើញលោកព្រាប សុវត្ថិ លោកណុប បាយ៉ារិទ្ធិ និងសូម្បីតែលោកឆន សុវណ្ណរាជ ដែលចេញទៅដល់សហរដ្ឋអាមេរិកទៅហើយ ក៏នៅតែមានគេនិយាយពីភាពរីកចម្រើនរបស់ពួកលោក។ ម្នាក់ៗកត់សម្គាល់ថា ភាពថមថយនេះ គឺបន្ទាប់ពីលេចធ្លាយកាន់តែខ្លាំងពាក់ព័ន្ធនឹងរឿងខេមរៈ សិរីមន្ត មានប្រពន្ធ និងកូនមួយ ដែលលោកនៅតែច្រានចោលនោះ។ ប្រភពជាច្រើននៅតែចោទថាលោកព្យាយាមបំភ្លៃការពិត ទើបធ្វើឲ្យពួកគេមិនសប្បាយចិត្ត ប៉ុន្តែក្រុមមនុស្សមួយចំនួនផ្សេងទៀត ក៏គិតថានោះជារឿងយល់ច្រឡំផងដែរ។ ទោះយ៉ាងណា គេកត់សម្គាល់ថា យីអ៊ុន របស់ខេមរៈ សិរីមន្ត ហាក់មិនសូវមានសន្ទុះប៉ុន្មានឡើយ បើធៀបនឹងរយៈមុន គឺមុនពេលមានការលើកឡើងថា លោកមានទាំងប្រពន្ធ និងកូនម្នាក់ នៅឯស្រុកកំណើតរួចហើយនោះ។
លោកខេមរៈ សិរីមន្ត មិនអាចឆ្លើយតបបានទេ ប៉ុន្តែយោងតាមការបញ្ជាក់ពីតំណាងមួយរូបនៅសាន់ដេ បានបញ្ជាក់ថា មួយរយៈនេះ ខេមរៈ សិរីមន្ត ពិតជាមិនសូវមានសន្ទុះខ្លាំងមែន ប៉ុន្តែនោះគឺដោយសារតែលោកពិបាកឡើងឆាក និងមិនមានឱកាសចេញច្រៀងសម្ពោធបទថ្មីៗ ដោយសារតែជាប់ជក់សូរចេញសម្ដែងរឿងថ្មី ជាមួយនាងសុខ ស្រីនាងតែប៉ុណ្ណោះ។
លោកមានប្រសាសន៍ស្របនឹងទីផ្សារភាគច្រើនថា «មិនមែនទេសិរីមន្តទេ ដែលស្ងាត់ និយាយរួមតារាស្ទើរទាំងអស់នៅសាន់ដេ គឺសុទ្ធតែអញ្ចឹង ព្រោះអីទី១ពួកគេអត់មានពេលហាត់សម និងលេងស្ទីលថ្មីៗ ដើម្បីឡើងឆាក ហើយម្យ៉ាងអ្នកណាក៏ដឹងដែរថា បើទោះជាបទថ្មីរបស់តារាម្នាក់ពីរោះ និងខ្លាំង ក៏មិនអាចជោគជ័យណាស់ណាដែរ បើតារានោះអត់មានពេលឡើងប្រូម៉ូដអញ្ចឹង»។ លោកនៅតែមានជំនឿថា លោកខេមរៈ សិរីមន្ត មិនស្ងាត់បែបហ្នឹងទេ គឺលោកពិតជាធ្វើឲ្យមហាជនកក្រើកខ្លាំងឡើងវិញ ហើយស្រួលមិនស្រួលគឺលោកនឹងឡើងសន្ទុះខ្លាំងជាងពីមុនផង នៅពេលដែលលោកកាន់តែទំនេរពីការងារថតខ្សែភាពយន្ត ហើយអាចចេញមុខឡើងឆាកញឹកញាប់ឡើងវិញ។ ជាក់ស្ដែងក្នុងពេលខ្សែរឿងរបស់គាត់ចេញបញ្ចាំង នោះគឺពិតជាភស្ដុតាង ១០០% ដែលតារារូបនេះ នឹងមានជំនឿចិត្ត។ ក្នុងពេលដ៏ខ្លី លោកខេមរៈ សិរីមន្ត នឹងចេញច្រៀងឲ្យកំរើកដូចដើម ដោយលោកគ្រោងបញ្ចេញស្ទីលប្លែកៗ មិនឲ្យចាញ់កាលលោកបានលេងស្ទីលខ្លីនាម្ដងនោះផង។ ចាំមើលៗតើលោកខេមរៈ សិរីមន្ត នឹងខ្លាំងដូចការគ្រោងទុករបស់សាន់ដេ ឬយ៉ាងណា បើពេលនេះលោកហាក់ដូចជាថមថយសន្ទុះ ដែលមើលទៅសូម្បីតែបទថ្មីរបស់លោក ដែលអ្នកខ្លះនិយាយថាពីរោះណាស់ៗនោះ ក៏មិនសូវមានឥទ្ធិពលស្រូបទាញមហាជនក្រាស់ក្រែលដូចពេលនេះ?
ដោយ៖ សម្បត្តិ
No comments:
Post a Comment