ភ្នំពេញៈ បន្ទាប់ពីទទួលរងនូវការរិះគន់ជុំវិញការសម្តែងនៅក្នុងរឿង «រាជនីបញ្ចពណ៌» ពិធីការិនីនាង ឌួង ហ្សូរីដា ក៏បានប្រកាសថានឹងលាចាកពីការសម្តែងស្របគ្នានោះដែរ។ ខណៈខ្សែភាពយន្តរឿង «រាជនីបញ្ចពណ៌» ត្រូវបានចាក់បញ្ចាំងលើកញ្ចក់ទូរទស្សន៍អាស៊ីអាគ្នេយ៍មិនបាន ប៉ុន្មានភាគផង ការរិះគន់ក៏បានកើតឡើង ពិសេសលើតួអង្គមួយចំនួន។ ជាក់ស្តែងការរិះគន់សង្កត់ធ្ងន់ទៅតួអង្គព្រះនាង «បញ្ចពណ៌» ដែលសម្តែងដោយពិធីការិនីនាង ឌួង ហ្សូរីដា។
ពាក្យសម្តីបន្តុះបង្អាប់នេះ ត្រូវបានអ្នកទស្សនាដាក់ចម្ងល់ទៅលើអ្នកជ្រើសរើសតួដោយលើកឡើង ថា៖«ខ្ញុំមិនដឹងជាខាងអ្នកដឹកនាំរឿងនេះ គេមើលឃើញចំណុចណាសមទេឲ្យនាង ហ្សូរីដា សម្តែងជាតួព្រះនាងបញ្ចពណ៌នោះ»។ ទស្សនិកជនបានបន្តថា៖«តួអង្គបញ្ចពណ៌ របស់នាង ហ្សូរីដា សម្តែងមិនសមទេ ព្រោះទាំងការសម្តែង និងទឹកមុខ ដូចជាមិនស៊ីនឹងឈ្មោះផង ហើយការសម្តែងរបស់នាងវិញក៏មើលទៅឃើញមានចំណុចឆ្គាំឆ្គង រឹងៗ ហើយមួយទៀតគាត់មិនសមសម្តែងជាតួបងស្រីអ្នកនាងចន ច័ន្ទលក្ខណា ទេ ព្រោះមើលមុខទៅបងក្មេង ប្អូនចាស់»។ មិនបង្អង់យូរ នាង ឌួង ហ្សូរីដា ក៏បានឆ្លើយតបនឹងការរិះគន់នោះថា៖ «ខ្ញុំមិនដឹងថា កម្រិតនៃការសម្តែងរបស់ខ្ញុំបានល្អ ឬអាក្រក់បានប៉ុណ្ណាទេ។ កាលដែលខ្ញុំសម្តែងមួយឈុតមួយឈុតនោះ ក៏ខ្ញុំមិនបានកំណត់ថា ok ដោយខ្លួនឯងដែរ នោះគឺខាងអ្នកដឹកនាំរឿង គេជាអ្នកថា បាន ខ្ញុំក៏បានតាមគេទៅ ហើយរឿងរើសតួវិញ ក៏ខ្ញុំមិនទាមទារសម្តែងតាមតែចិត្តខ្ញុំនោះដែរ»។ តួអង្គព្រះនាង បញ្ចពណ៌ រូបនេះបានលើកឡើងថា៖«អាជីពជាតារាសម្តែងនេះខ្ញុំប្រឡូកជិត ១០ឆ្នាំមកហើយ ហើយក្នុងបទពិសោធ ជិត១ទសវត្សរ៍នេះ ខ្ញុំគិតថា ខ្ញុំក៏អាចយល់ថា ការសម្តែងរបស់ខ្ញុំសម ឬមិនសមដែរ»។ តបទៅនឹងការរិះគន់នេះ នាង ឌួង ហ្សូរីដា បានចាត់ទុកថា បញ្ហានេះកើតចេញពីមនុស្សមួយក្រុមតូចដែលតែងតែដើរបង្កបញ្ហា នៅក្នុងសង្គមដោយពេលខ្លះយកឈ្មោះនាងធ្វើជាខែល ហើយធ្វើអ្វីមិនកើតក៏ព្យាយាមរកចំណុចអវិជ្ជមាននាងមកបរិហារ។ ស្របគ្នានឹងការរិះគន់យ៉ាងចាស់ដៃមួយនេះ កញ្ញាឯកសាប៊ូលុច្សឆ្នាំ២០០៥ រូបនេះ បានប្រកាសថា វត្តមានសម្តែងនៅក្នុងខ្សែភាពយន្ត រាជនីបញ្ចពណ៌ នេះ គឺជាខ្សែរឿងចុងក្រោយហើយសម្រាប់នាង បន្ទាប់ពីដើរកាត់ព្យុះភ្លៀងក្នុងសិល្បៈជិត៧ឆ្នាំកន្លងមកនេះ។ ប៉ុន្តែពិធីការិនីរូបនេះបានបញ្ជាក់ថា នាងមិនមែនដើរចេញដោយសារការរិះគន់នោះឡើយ ពោលគឺនាងត្រូវចំណាយពេលទៅលើការរកស៊ី និងអាជីពជាពិធីការិនីដែលកំពុងរវល់ស្ទើរគ្មានពេលវេលាសម្រាក នោះ។ តារាវ័យ៣០ឆ្នាំរូបនេះ បាននិយាយថា៖«ថ្វីដ្បិតតែខ្ញុំសម្រេចផ្អាកការងារសម្តែងភាពយន្ត នោះមែន តែសិល្បៈក្នុងស្ទូឌីយូ គឺខ្ញុំនៅតែស្វះស្វែងមិនដែលបន្ធូរដៃមួយគ្រាណាទេ»។ នាងបានបញ្ជាក់ថា៖«អ្វីៗដែលខ្ញុំទទួលបានមកដល់សព្វថ្ងៃនេះភាគ ច្រើនកើតចេញពីសិល្បៈ»៕
No comments:
Post a Comment