(ថ្ងៃទី 30 មិថុនា 2012, ម៉ោង 08:44:AM) | ដោយ: លីនណា
កញ្ញា កែវ នីសា បាននិយាយទៀតថា សម្រាប់វិស័យសិល្បៈវិញ កញ្ញាមានក្ដីស្រឡាញ់តាំងពីតូចមក ពីព្រោះកញ្ញាមានម្ដាយជាអ្នកសិល្បៈស្រាប់ ដែលគាត់ធ្លាប់ធ្វើជាតួឯកអប្សរា អ៊ីចឹងហើយដោយមានសែស្រឡាយជាអ្នកសិល្បៈ បានជាមានទំនោរមកចូលបម្រើក្នុងវិស័យសិល្បៈនេះ។ កញ្ញា នីសា បានឲ្យដឹងថា ការចូលបម្រើក្នុងវិស័យសិល្បៈដំបូង គឺគ្រាន់តែជាការសម្ដែងថតខារ៉ាអូខេ ហើយក៏បានបោះជំហានបន្តទៀត ឈានដល់ការថតជាខ្សែភាពយន្ដខ្នាតធំឲ្យផលិតកម្មមួយ តែមិនមែនជារឿងភាគបញ្ចាំងតាមទូរទស្សន៍ទេ ដោយសារតែពួកគាត់(ផលិតករភាពយន្ដ)ឃើញការសម្ដែងរបស់កញ្ញាតាមខារ៉ាអូខេ ហើយក៏បានហៅកញ្ញាឲ្យចូលថតភាពយន្ដ។ កញ្ញាបន្តថា ក្រោយមកទៀត ក៏ចេះតែមានគេស្គាល់ច្រើនបានបន្តទៅថតជាភាពយន្ដភាគ ដែលចាក់បញ្ចាំងតាមកញ្ចក់ទូរទស្សន៍ ដោយការចាប់ផ្ដើមដំបូង គឺមានការឆ្គាំឆ្គងមែនទែន ដោយកញ្ញាបញ្ជាក់ឲ្យដឹងថា “អ្នកដឹកនាំរឿងគាត់ប្រាប់ថា ប្លង់ហ្នឹងត្រូវឲ្យធ្វើភ័យ ព្រោះអីត្រូវគេចាប់ចងនៅក្នុងព្រៃ តែខ្ញុំធ្វើអត់បាន ហើយខ្ញុំដឹងថា ខ្ញុំធ្វើឆ្គង ហើយគាត់ប្រាប់ខ្ញុំថា នីសា អូនឯងលេងអត់ទាន់បានទេ ពេលហ្នឹងមានអារម្មណ៍តូចចិត្តខ្លួនឯងផង ហើយក៏អរគុណចំពោះគាត់ដែលគាត់បានប្រាប់។ ហើយពេលហ្នឹងក៏ខំប្រមូលអារម្មណ៍ និងស្ដាប់បងៗដែលជារៀមច្បង គាត់បានពន្យល់ប្រាប់ ហើយក៏បានវិវត្តន៍បន្តិចម្ដងៗ”។ កញ្ញាបន្ថែមថា ក្រោយពេលបានថតបានពីររឿង មើលឃើញខ្លួនឯងថា គ្រាន់បើជាងមុន មិនសូវជាឆ្គងណាស់ណា តែមិនមានន័យថា សម្ដែងបានល្អឥតខ្ចោះអីទេ គឺនៅតែមានចំណុចខ្វះខាត។ នីសា បានបង្ហើបឲ្យដឹងថា នៅពេលនេះដែរ កញ្ញាបាននិងកំពុងថតរឿងភាគទូរទស្សន៍មួយមានចំណងជើងថា “បង្គាប់ចិត្ត បិទបេះដូង” ដែលថតបានប្រហែលជា ៧០ភាគរយហើយ។ ចំពោះការដែល នីសា បាត់មុខពីវិស័យសិល្បៈមួយរយៈកាលកន្លងមកនេះ កញ្ញា នីសា បានបញ្ជាក់ឲ្យដឹងថា “ការដែលនាងខ្ញុំបាត់មុខមួយរយៈពីការសម្ដែងពីវិស័យសិល្បៈនោះ គឺនាងខ្ញុំមានការរវល់ផ្ទាល់ខ្លួន គឺបានបើកជាមុខរបរខ្លួនឯងបន្តិចបន្តួច អ៊ីចឹងទៅរវល់ ដែលមិនជាយូរអីទេ គឺជិតមួយឆ្នាំ។ ជាចុងក្រោយកញ្ញា កែវ នីសា បាននិយាយថា ដោយសារតែក្ដីស្រឡាញ់ និងចង់បម្រើក្នុងវិស័យសិល្បៈ ដែលធ្វើឲ្យកញ្ញាមិនអាចបោះបង់ចោលវិស័យសិល្បៈនេះបានទេ គឺត្រឡប់ចូលខ្លួនក្នុងវិស័យនេះវិញ ដោយមានក្ដីនឹករលឹកខ្លាំងមែនទែននៅពេលដែលខកខានមិនបានចូលខ្លួននៅក្នុងសិល្បៈ៕ S
No comments:
Post a Comment