ដោយ: ពិទូរ្យ
ដំណើរឆ្លងកាត់ចូលសិល្បៈដែលមានរយៈពេលខ្លីពិតមែន តែតារារូបនេះ ត្រូវបានផលិតកម្មក្នុងស្រុកមួយចំនួនទាក់ទងដើម្បីថតឈុតខារ៉ាអូខេជាហូរហែ។ ទោះបីមិន ទាន់ឆក់បានតំណែងជាតារាសម្ដែងជួរមុខ តែអេកូវ៉ាក គឺជាតារា ប្រុសម្នាក់ដែលទើបតែប្រឡូកក្នុងពិភពសិល្បៈ ហើយមានយីអ៊ុនខ្ពស់ ព្រោះលោកអាចមានឱកាសចេញសម្តែងខារ៉ាអូខេ ឲ្យផលិតកម្មល្បីៗ ក្នុងស្រុកជាបន្តបន្ទាប់ ។ តារារាងខ្ពស់ស្តើងរូបនេះបានឲ្យ CEN ដឹងថា “ខ្ញុំស្រឡាញ់សិល្បៈណាស់ តែពីមុនមិនមានឱកាស និងបានចូលឡើយ ហើយក៏មិនដែលគិតថាបានចូលទេ ព្រោះតារាមួយចំនួនពួកគាត់ចូលតាមរយៈការប្រឡង ឬក៏មានសែស្រឡាយជាអ្នកសិល្បៈ។ សម្រាប់ខ្ញុំ គឺជាការចៃដន្យមែនទែន ព្រោះខ្ញុំមិនបានប្រឡង ឬមានសាច់ញាតិជាសិល្បៈឡើយ”។ ស្ទើរតែគ្រប់ស្ថានីយទូរទស្សន៍ដែលបានចាក់ផ្សាយរឿងភាគកូរ៉េ ទើបធ្វើឲ្យយុវវ័យមួយចំនួនដែលនិយមតុបតែងកាយ ងាកមកលេងស្តាយបែបកូរ៉េ។ ហើយនេះ ជាឱកាសមួយសម្រាប់តារាសម្តែងរូបនេះ ព្រោះថា សម្រស់ពីធម្មជាតិរបស់គេ និងការតុបតែងបែបយ៉េៗ ដែលមើលទៅអាចថាជាតួកូរ៉េក៏ថាបាន ទើបធ្វើឲ្យតារាវ័យ ២៣ឆ្នាំរូបនេះមានឱកាសចូលជាតារាសម្តែង ដោយមិនបានព្រាងទុក។ អេកូ បានឲ្យដឹងបន្តថា “ខ្ញុំធ្វើការនៅក្រុមហ៊ុនមួយ ដោយសារគាត់(អ្នកដឹកនាំសម្តែង) ឧស្សាហ៍ចេញចូលកន្លែងខ្ញុំធ្វើការ គាត់ចាប់អារម្មណ៍លើខ្ញុំ គាត់ក៏ឲ្យខ្ញុំសម្តែងតែម្តងទៅ ពីដំបូងខ្ញុំចេះតែស្ទាក់ស្ទើរ ព្រោះខ្លាចសម្តែងមិនសម”៕ S
No comments:
Post a Comment