04 July 2012 ស៊ូ វុទ្ធី
តារាសម្តែងជើងចាស់លោក យុត្ថារ៉ា ឆានី និងភរិយាអ្នកនាង ចន ច័ន្ទលក្ខិណា ពេលចូលរួមកម្មវិធីកន្លងមក។ រូបថត ឈឹម ស្រីនាង
ភ្នំពេញៈ ក្រោយពីប្រឡូកក្នុងអាជីពសិល្បៈសម្តែង មិនតិចជាង២ទសវត្សរ៍នោះ ប្តីប្រពន្ធជ្រកក្រោមដំបូលសិល្បៈដូចគ្នា លោក យុត្ថារ៉ា ឆានី និងអ្នកនាង ចន ច័ន្ទលក្ខិណា ត្រូវបានចាត់ទុកជាតារារៀមច្បងដ៏មានសមត្ថភាពក្នុង វិស័យសិល្បៈ។ ទន្ទឹមនឹងមានសមត្ថភាពបន្សល់ទុកជាគំរូដល់អ្នកសិល្បៈជំនាន់ក្រោយ នោះ គេគិតថា គូស្នេហ៍សិល្បៈមួយគូនេះ នឹងសល់ប្រាក់កាសសង់ផ្ទះវីឡារស់នៅស្កឹមស្កៃមើលទៅ! ប៉ុន្តែផ្ទុយទៅវិញបែរជាអ្នកស្រី វ៉ាន់ ដានី លាតត្រដាងថា លក្ខិណា និង ឆានី បម្រើសិល្បៈជាង២០ឆ្នាំហើយ តែមិនទាន់មានផ្ទះរស់នៅផ្ទាល់ខ្លួនទេ។
អ្នកស្រី វ៉ាន់ ដានី វ័យ៥៩ឆ្នាំជាម្តាយបង្កើតរបស់តារាសម្តែង អ្នកនាង ចន ច័ន្ទលក្ខិណា បានមានប្រសាសន៍ថា៖«កូនៗខ្ញុំ លក្ខិណានិង ឆានី ធ្វើការបម្រើសិល្បៈ២០ឆ្នាំហើយ នៅមិនទាន់មានផ្ទះនៅផ្ទាល់ទេ គឺសព្វថ្ងៃនៅតែរស់នៅក្នុងបន្ទុកម្តាយឪពុកនៅឡើយ»។ រឿងគ្មានលុយកាក់សម្រាប់រស់នៅឲ្យសុខស្រួលមានផ្ទះសម្បែងនេះ ត្រូវបានអ្នកស្រីជាម្តាយដាក់បន្ទុកថា បណ្តាលមកពីប្តីប្រពន្ធមួយគូនេះរកស៊ីទៀងត្រង់ពេក។ អ្នកស្រីនិយាយថា៖ «ពួកកូនៗខ្ញុំជាមនុស្សទៀងត្រង់សុចរិត ហើយខ្ញុំជាម្តាយក៏ដូចគ្នារបររកស៊ីដឹកខ្សាច់នេះមិនក្រោម២០ ឆ្នាំហើយដែរ តែរកប្រាក់ចែកកូនឲ្យទិញផ្ទះ នៅបែកក៏មិនបាន ព្រោះថាខ្ញុំក៏រកស៊ីទៀងត្រង់»។ មុននេះគេល្បីថា លោកយុត្ថារ៉ា ឆានី និងអ្នកនាង ចន ច័ន្ទលក្ខិណា ទិញខុនដូតម្លៃរាប់ម៉ឺនដុល្លារ តែទាក់ទិននឹងបញ្ហានេះ អ្នកស្រី វ៉ាន់ ដានី បានឲ្យដឹងថា៖ «ពួកគេមានយីអ៊ុនបានទៅដេកនៅខុនដូនោះ ក៏ព្រោះតែលោកថៅកែកាណាឌីយ៉ា គាត់មានចិត្តអាណិតអាសូរ ហើយក៏ឲ្យស្នាក់នៅដោយមិនទាមទារពីពួកគេសូម្បីមួយកាក់មួយសេន ឡើយ»។ រាល់អាថ៌កំបាំងដែលកប់ជ្រៅក្នុងរង្វង់គ្រួសាររាប់សិបឆ្នាំត្រូវ បានលាតត្រដាងនាពេលនេះ លោក យុត្ថារ៉ា ឆានី ដែលជាកូនប្រសា បានទទួលស្គាល់ការពិតដោយលោកបានប្រាប់ថា៖ «ពាក្យសម្តីដែលម្តាយក្មេកខ្ញុំនិយាយទាំងប៉ុន្មានខាងលើនេះជា ការពិតទាំងអស់»។ នៅពេលអ្វីៗត្រូវលាតត្រដាង លោកយុត្ថារ៉ា ឆានី បាននិយាយយ៉ាងសាមញ្ញថា៖«ខ្ញុំមិនមានការអាក់អន់ចិត្តនឹងម្តាយ ក្មេកឬយ៉ាងណានោះឡើយ ហើយក៏មិនបានធ្វើឲ្យប៉ះពាល់កិត្តិយសកូនៗជាតារាភាពយន្តល្បី នោះដែរ ផ្ទុយទៅវិញខ្ញុំគិតថា ពាក្យនេះប្រាប់ដល់ទស្សនិកជនឲ្យបានដឹងឮថា ពួកខ្ញុំធ្វើការបម្រើសិល្បៈស្មោះមិនយកសិល្បៈដូរយកវីឡា ឬឡានទំនើបៗជិះដែរ»។ ជាមួយនឹងជីវភាពយ៉ាងសាមញ្ញ មិនមានទ្រព្យធនក្រាស់ក្រែល លោកយុត្ថារ៉ា ឆានី បាននិយាយដោយចម្ងល់ចំពោះខ្លួនឯងថា៖ «ខ្ញុំក៏ឆ្ងល់ខ្លួនឯងដែរ ប្រឡូកសិល្បៈពីរនាក់ប្តីប្រពន្ធមិនក្រោម២០ឆ្នាំទាំងយប់ទាំងថ្ងៃ នៅតែមិនសល់លុយទិញផ្ទះ ទិញវីឡានៅនឹងគេ ផ្ទុយទៅវិញតារាស្រករៗក្រោយខ្លះមិនទាន់ស្គាល់កាមេរ៉ាច្បាស់ផង គេប្រកាសឡើងផ្ទះ ឡើងវីឡាយ៉ាងគ្រហើៗ»។ ទោះបីយ៉ាងនេះក្តី លោកឆានី អះអាងថា៖«មិនមែនថាពួកខ្ញុំ អត់មានលុយទិញផ្ទះនៅសោះនោះទេ តែពួកខ្ញុំពួននៅជុំក្បាលគ្នាជាមួយម្តាយក្មេកនេះមកពីក្រុម គ្រួសាររបស់ខ្ញុំមិនចូលចិត្តរស់នៅបែកគ្នា ហេតុនេះក៏ចេះតែនៅបែបនេះទៅ»៕
No comments:
Post a Comment