source : vorakchun
ភ្នំពេញ ៖ បន្ទាប់ពីដាក់ពាក្យសុំឈប់ពីផលិតកម្មអេមរួចមក តារាចម្រៀងសម្បុរស្រអែម សុខ សីឡាលីន ហាក់បង្ហាញពីអារម្មណ៍ស្ទាក់ស្ទើរក្នុងការចុះចូលនៅផលិតកម្មផ្សេងៗ ព្រោះថា នាងមានជម្រើស៣ ដើម្បីបន្ដកេរ្ដិ៍ឈ្មោះនិងរក្សាតំណែងជាតារាចម្រៀងខណៈដែលទស្សនិកជនមួយចំនួនបានលើកឡើងថា នាងនឹងចូលទៅផលិតកម្មសាន់ដេ ឬផលិតកម្មថោន ។ ក៏ប៉ុន្ដែអ្វីៗមិនបានដូចការគិតទុកនោះទេ ហើយពេលនេះនាង បានបង្ហាញមុខនៅផលិតកម្មហង្សមាសទៅហើយ ។
ការបង្ហាញវត្ដមាននៅក្នុងក្រុមហង្សមាសនេះគឺជាការបញ្ជាក់ នូវជំហរថ្មីមួយ ដើម្បីបញ្ចប់មន្ទិលសង្ស័យហើយការសម្រេចចិត្ដបោះបង់ចោលទ្រនំចាស់របស់ សុខ សីឡាលីន ដោយមិនស្ដាយស្រណោះនេះ ត្រូវបានគេពិពណ៌នាថា មកពីមូលហេតុដែលនាងមិនសូវបានចេញមុខចេញមាត់ច្រើនដូចតារាដ៏ទៃ រាល់កម្មវិធីនានាដែលត្រូវបាន អញ្ជើញពីក្រុមហ៊ុនឯកជន ជាពិសេសខុនសឺតធំៗតែម្ដង ទើបធ្វើឱ្យនាងមិនសូវទទួលបានប្រាក់ចំណូល។
ម្យ៉ាងទៀត កេរ្ដិ៍ឈ្មោះរបស់នាងនៅផលិតកម្មអេម ក៏មិនសូវលោតជាងតារាមួយចំនួនទៀតដែរ ដូច្នេះហើយទើបជំរុញឱ្យ នាងធ្វើការផ្លាស់ប្ដូរ និងវេចបង្វិចចេញដោយមិនស្ដាយស្រណោះបែបនេះ ។
សុខ សីឡាលីន បានចូលច្រៀងនៅផលិតកម្មអេមតាំងពីឆ្នាំ២០០៧មកម្ល៉េះ តែកេរ្ដិ៍ឈ្មោះរបស់នាងមិនសូវទទួលបានការគាំទ្រនោះទេ ព្រោះបទចម្រៀងរបស់នាងពេលចេញលក់នៅលើទីផ្សារមានគម្រិតតិចតួចបំផុត ។ ដូច្នេះមិនអាចឱ្យនាងដណ្ដើមយកភាពល្បីល្បាញបានដូចតារាចម្រៀងដ៏ទៃទៀតបាន ។ នៅផលិតកម្មអេម បទចម្រៀង របស់កញ្ញាស្រអែមរូបនេះ មានបទចម្រៀងពីរបទ ដែលគេនិយមស្ដាប់ច្រើនគឺបទ “អុនជាអ្នកខុស” និងបទ “កាន់ តែចៀសកាន់តែជួប” បទនេះច្រៀងឆ្លងឆ្លើយជាមួយតារាចម្រៀង ឆាយ វិរៈយុទ្ធ ។
ប៉ុន្ដែទស្សនិកជនក៏កំពុងរងចាំមើល តារាចម្រៀងរូបនេះពេលចេញពីផលិតកម្មអេម ចូលមកហង្សមាសអាចដណ្ដើមយកកេរ្ដិ៍ឈ្មោះល្បីបានដូចតារាដ៏ទៃ ទៀតដែរឬយ៉ាងណា ? បើពេលនេះហង្សមាសមានតារាចម្រៀងជាច្រើនកំពុងតែតម្រង់ជួរគ្នា ខ្លះឈរជើង រកការងារធ្វើគ្មានផងនោះ ។ តួយ៉ាងដូចករណីកញ្ញាកូនកាត់ចិន គៀត សុវណ្ណឡាង ជាដើម នាងចូលហង្សមាសជិត២ឆ្នាំ ទៅហើយ តែបទចម្រៀងរបស់នាងមិនទាន់ចេញលក់លើទីផ្សារនោះឡើយ ។
សុខ សីឡានលីន បាននិយាយថា នាងបានកុងត្រាជាមួយនឹងផលិតកម្មហង្សមាសរួចហើយ គឺសព្វថ្ងៃនេះនាងក៏មមាញឹកដើម្បីផលិតបទចម្រៀងថ្មីរបស់ខ្លួនផងដែរ ។ ការចេញទៅកាន់ទ្រនំកំពូលនេះ ត្រូវកញ្ញា សុខ សីឡាលីន និយាយថាគឺជាការបង្កើននូវបទពិសោធន៍ប៉ុណ្ណោះ ។ នាងមិនបានបញ្ជាក់អំពីមូលហេតុនោះទេ ។ ទន្ទឹមនឹងការផ្លាស់ប្ដូរទ្រនំនេះផងដែរ សុខ សីឡាលីន នៅតែរក្សាចំណងស្នេហ៍នៅដដែលជាមួយនឹងកំលោះសង្ហាម្នាក់ស្ថិតក្នុងក្រុមចចក សមុទ្រ៕ ដោយ ប្រុសធី
No comments:
Post a Comment